Veftré  |  Hafa samband  |  Sjálfboðaliðar  
Flóðbylgjan fimm árum síðar

Sendifulltrúar í Indónesíu

Þann 26. desember 2004 urðu náttúruhamfarir í Suður-Asíu sem teljast með þeim mannskæðustu í sögunni. Alþjóða Rauði krossinn sendi strax sama dag út hjálparbeiðni og á síðustu dögum ársins héldu fyrstu tveir sendifulltrúar Rauða kross Íslands til starfa á svæðinu, einn til að meta þörf fyrir áfallahjálp, annar til að taka þátt í samhæfingu aðgerða með skýrslugerð. Fyrir á svæðinu var þriðji sendifulltrúinn að störfum við þróunarsamvinnu.

Neyðaraðstoð í kjölfar Tsunami einkenndi störf sendifulltrúa Rauða kross Íslands á árinu 2005 en Rauða kross hreyfingin tók strax þátt í björgunaraðgerðum og síðar í uppbyggingarstarfi í löndunum við Indlandshaf.

Árið 2006 skipulögðu sendifulltrúar Rauða kross Íslands sálfélagslega þjónustu við fórnarlömb Tsunami á Sri Lanka og tóku þátt í uppbyggingu heilsugæslu ásamt því að skipuleggja almennt hjálparstarf í Acehéraði á eynni Súmötru í Indónesíu.

Baldur Steinn Helgason BA í mannfræði og með diplómu í birgðastjórnun starfaði með Alþjóðasambandi Rauða krossins og Rauða hálfmánans (IFRC) við birgðastjórnun í Acehhéraði á Súmötru í Indónesíu frá 25. apríl til 25. október 2005.

Grein fra Baldri Steini 06.05.2005
 


Birna Halldórsdóttir BA í mannfræði starfaði í Acehhéraði á Súmötru í Indónesíu þar sem hún stýrði dreifingu hjálpargagna á vegum Alþjóðaráðs Rauða krossins (ICRC) frá 6. janúar 2005 til 14. apríl 2005.

Grein frá Birnu þann 28.03.2005
 
 

Guðbjörg Sveinsdóttir geðhjúkrunarfræðingur fór til Indónesíu í lok desember 2004 og var í einn mánuð þar sem hún undirbjó sálfélagslega aðstoð fyrir þá sem komust lífs af úr náttúruhamförunum. Guðbjörg starfaði á vegum Alþjóðasambands Rauða krossins og Rauða hálfmánans (IFRC).
  Hildur Magnúsdóttir verkefnisstjóri, MSc í hjúkrunarfræði, stýrði hjúkrunarstarfi Alþjóðaráðs Rauða krossins (ICRC) í tjaldbúðum í Acehhéraði á Súmötru frá 19. janúar til 20. mars 2005. Þar var veitt göngudeildarþjónusta fyrir sjúklinga sem höfðu verið útskrifaðir af sjúkrahúsi og höfðu misst heimili sín þegar flóðbylgjan fór yfir. Sjúklingar og fjölskyldur þeirra gistu í tjaldbúðum Rauða krossins.
  Hjördís Guðbjörnsdóttir hjúkrunarfræðingur starfaði við heilsugæsluverkefni í Acehhéraði á Súmötru í Indónesíu með Alþjóðaráði Rauða krossins (ICRC) frá 24. febrúar 2006 til 15. júlí 2006.
 
  Hólmfríður Garðarsdóttir hjúkrunarfræðingur og ljósmóðir starfaði sem ljósmóðir með Alþjóðaráði Rauða krossins (ICRC) á norsku tjaldsjúkrahúsi sem sett var upp í Acehhéraði á Súmötru í Indónesíu í kjölfar flóðbylgjunnar. Hún var þar frá 3. febrúar 2005 til 13. mars 2005.

Grein frá Hólmfríði 21.03.2005
 

Ómar Valdimarsson blaðamaður starfaði á vegum Alþjóðasambands Rauða krossins og Rauða hálfmánans (IFRC) að uppbyggingu starfs Rauða krossins í Indónesíu frá 28. september 2003 til 17. nóvember 2005. Hann tók virkan þátt í viðbrögðum hreyfingarinnar við náttúruhamförum í landinu.
  Óskar Þorvaldsson byggingatæknifræðingur starfaði við vatnsveituverkefni á eynni Nias í Indónesíu í kjölfar flóðbylgjunnar á vegum Alþjóðasambands Rauða krossins og Rauða hálfmánans (IFRC) frá 28. apríl til 14. júní 2005.
 

Robin Bovey líffræðingur stjórnaði dreifingu hjálpargagna á vegum Alþjóðaráðs Rauða krossins (ICRC) í Acehhéraði á Súmötru í Indónesíu frá 7. janúar 2005 til 4. september 2006.

Grein eftir Robin 26.06.2006

Grein frá Robin 24.01.2005

Grein frá Robin 14.01.2005
  Sigríður Björk Þormar hjúkrunar- og heilsusálfræðingur starfaði að verkefni sem danski Rauði krossinn skipulagði við þjálfun sjálfboðaliða og heilbrigðisstarfsfólks í áfallahjálp á Súmötru í Indónesíu frá 12. til 26. janúar 2005.
  Sigurður Ingi Pálsson kerfisfræðingur hafði umsjón með tölvu- og fjarskiptamálum Alþjóðasambands Rauða krossins og Rauða hálfmánans (IFRC) í Acehhéraði á Súmötru í Indónesíu frá 1. júlí 2005 til 3. apríl 2006.
  Þorkell Þorkelsson ljósmyndari fór í starfsferð til Indónesíu og Sri Lanka fyrir Rauða kross Íslands og Alþjóðasamband Rauða krossins og Rauða hálfmánans (IFRC). Ljósmyndir Þorkels voru birtar í riti Alþjóðasambandsins og voru notaðar við upplýsingagjöf til almennings á Íslandi. Myndir Þorkels frá flóðasvæðunum voru valdar sem besta myndaröð ársins 2005 á ljósmyndasýningu blaðaljósmyndarafélags Íslands. Þorkell vann að verkefninu frá 15. september til 15. október 2005.

Þorkell var á ferð í Aceh héraði í september 2005 með Maude Fronberg upplýsingafulltrúa Alþjóða Rauða krossins. Grein eftir hann og myndir Þorkels 23.11.2005