Ef maður myndi taka frá 10 kr á dag, hversu mikið myndi það hjálpa við að breyta lífsstíl fólks í þróunarlöndunum?

Erfitt gæti reynst að breyta lífsstíl fólks í þróunarlöndunum á einu bretti. Lífsstíll íbúa þessara landa er í raun heldur ekki vandamálið, heldur skortur þeirra á aðgengi að félagslegum úrbótum svo sem menntun og heilsugæslu. Það er frekar að lífsstíll okkar, íbúa á vesturlöndum, sé vandamál allra íbúa jarðarkringlunnar enda er hann á kostnað umhverfisins og afar þurftafrekur á auðlindir heimsins.

En með því til dæmis að taka frá tíu krónur á dag, gætir þú aðstoðað hjálparstofnanir eins og Rauða krossinn við að koma aðstoð til hinna verst settu eða öllu heldur að Rauði krossinn geti stutt fólk til að hjálpa sér sjálft. Til dæmis styrkir Rauði kross Íslands alnæmisverkefni í Malaví og Mósambík þar sem mikil þörf er á fjármagni. Einnig styrkir RKÍ götubarnaverkefni í Mósambík svo eitthvað sé nefnt. Stofnanir sem þessar þurfa ávallt á gjafafé frá almenningi að halda til þess að geta haldið út verkefnum sem þessum.

Þó svo að tíu krónur sé ekki mikill peningur í hugum okkar íslendinga getur þessi aur gert gæfumuninn fyrir fátækt fólk. Til marks um það er talið að um einn og hálfur milljarður manna í heiminum í dag lifi undir fátæktarmörkum sem er einn dollari á dag. Stofnanir líkt og Rauði krossinn reyna að vega og meta verkefni í hverju landi fyrir sig og finna úrlausnir með yfirvöldum og íbúum á hverjum stað, um hvernig framlög nýtast þurfandi sem best. Íslendingar ættu að vera vel í stakk búnir til að aðstoða fólk í fátækustu ríkjum heims þar sem Ísland er eitt af ríkustu löndum heims í dag. Hægt er að sjá lista yfir ríkustu og fátækustu lönd heims samkvæmt Human Development Index (HDI) sem er reiknistuðull Sameinuðu þjóðanna yfir rík og fátæk lönd (http://www.infoplease.com/ipa/A0778562.html). Einnig er hægt að fara beint inn á www.undp.org. Með því að skoða þennan lista gerir þú þér ef til vill betur í hugarlund hversu margir það eru sem þurfa á aðstoð okkar að halda. Hvort sem við gefum tíu krónur á dag eða þúsund krónur á dag, þá er allt gjafafé ávallt af hinu góða.

Einnig viljum við benda á vefsíður Rauða krossins (www.icrc.org, www.ifrc.org, www.redcross.is) varðandi frekari upplýsingar um starf hreyfingarinnar.

Ég vona að þetta veiti þér einhver svör við spurningu þinni,
kær kveðja frá Rauða krossi Íslands.

Unnið af starfsnemum frá Háskólanum á Akureyri; Elísabetu I. Einarsdóttur og Steingrími Sigurðssyni

Hvernig er spornað við barneigum í þróunarlöndum?

Hvernig er spornað við barneignum í þróunarlöndunum. Hvergi í umræðu um bág kjör og vesöld heyri ég um getnaðarvarnir. Hvernig er þessari hjálp farið. Á meðan ég heyri ekkert um að reynt sé að takmarka fólksfjölda þar sem neyðin er mest get ég ómögulega verið að styðja endalaust að gefið sé mjöl og halda svo áfram að horfa á myndir af hungruðum börnum ár eftir ár þar sem þessi tækni er til í heiminum og tókst ágætlega í Kína.

Svar:
Það sem hefur gefist hvað best í viðleitninni við fækkun barneigna í heiminum er menntun og fræðsla. En það tekur tíma og þarfnast meiri fjármuna en virðast vera fáanlegir, því miður.  Það er víða fjallað um þennan þátt en kannski þurfum við sem störfum að þessum málaflokki hér á landi einmitt að huga betur að því að koma þessum málum meira í umræðuna. Þakka þér ábendinguna.

Í þeim tvíhliða verkefnum sem Rauði kross Íslands styður s.s. í sunnanverðri Afríku -  í heilsugæslu og stuðningi við alnæmissjúka  - er mikið unnið að fræðslu, m.a. um getnaðarvarnir og barneignir. En þar er samt sem áður nauðsynlegt að veita aðstoð við að auka matvælaframleiðslu eða tímabundna mataraðstoð þar sem mörg börn hafa misst foreldra sína og um leið fyrirvinnu fjölskyldunnar og þeir sem sjúkir eru geta ekki unnið fyrir sér.

Hversu margir hafa ekki aðgang að hreinu drykkjarvatni?

Um það bil 1,4 miljarður manna hafa ekki aðgang að hreinu drykkjarvatni. Að minnsta kosti 2 milljónir barna deyja ár hvert úr sjúkdómum sem tengjast skorti á hreinu drykkjarvatni, og í nokkrum þróunarlandanna má rekja 80 prósent af öllum sjúkdómum til skorts á hreinu vatni.

Í minnst þróuðu löndunum hafa 41 prósent íbúa ekki aðgang að hreinu drykkjarvatni.

Hver eru vandmálin í tengslum við vatn?
Vatn er fólki lífsnauðsynlegt. Það er einfaldlega ekki hægt að lifa án vatns, og fullorðið fólk þarf milli 3 og 7 lítra af hreinu drykkjarvatni á dag. Margir hafa ekki aðgang að hreinu drykkjarvatni.

Í mörgum af fátækustu löndum og borgum heims er næsta vatnsból í margra tíma göngufjarlægð, og eyða því konur dýrmætum tíma í að ganga fram og til baka með vatn. Síðan er það líka algengt að vatnið sé ekki einu sinni hreint, og fólk verður veikt af því að drekka það. Það hefur síðan í för með sér að fólk verður veikburða og á erfiðara með að læra.

Þess vegna snýst þróunarhjálp svo oft um að útvega hreint drykkjarvatn, kenna hvernig yrkja á landið sem best og reyna að koma börnum í skóla.

Í náttúruhamförum er hreint vatn lang oftast vandamál. Til dæmis varð Mósambík fyrir miklum hamförum vegna flóða í mars 2000 þar sem heilu bæirnir fóru á kaf. Í svona tilfellum verður drykkjarvatn alltaf vandamál. Það er vegna þess að bæði brunnar og skolpræsi flæða yfir og vatnið blandast saman. Það endar með því að það er ekki til neitt hreint vatn.

Þegar þetta gerist er hægt að tryggja hreint vatn með hjálp nokkurra lítilla vatnshreinsitaflna.

Vatnshreinsitöflur geta hreinsað mengandi örverur á efnafræðilegan hátt, þannig að óhreint vatn breyttist í drykkjarhæft vatn. Ein vatnshreinsitafla kostar um það bil 7 krónur og getur hreinsað 10 lítra af vatni.